Өлеңдер ✍️

Қасымдасың сен менің, қасымдасың,
Енді арамыз ешқашан ашылмасын.
Жүрекке әмір жүрмесі анық болса,
Бізді біреу бопсалап басынбасын.
Қасымдасың сен менің,
Мәңгіліксің,
Қайталайды даусымды жаңғырып шың.
Болмысыңмен жаулапсың жан-тәнімді,
Тандырыпсың есімнен, тандырыпсың.
Қасымдасың сен менің ерте-кеште,
Жандырмасқа қоймадың, өртемеске.
Күлі көкке ұшқанша көзді үйіру
Махаббаттың қашанғы серті емес пе?!
Қасымдасың сен менің, қайда жүрсем,
Адалың – мен, адамды айыра білсең.
Күні-түні қолымнан түсірмейтін,
Желбірейтін желкілдеп байрағым – сен!
Қасымдасың сен менің, кер маралым,
Қадіріңді түсінер мен ғанамын.
Шаң жетпейтін шыңына шырқауыңмын,
Түк қалдырмай түбімнің терге бәрін.