Өлеңдер ✍️

Бұрынғының сөздері,
Батыр қолда билеткен.
Жер қопарып, сүйреткен.
Суға малған сойылдай,
Бұрынғының сөздері.
Жаурап келіп кіретін,
Жалаң еттен сүйетін
Жалындаған қойындай.
Бұрынғының дегені,
Сан бұралып ашылған,
Ашсаң нұры шашылған
Сандықтағы құлпыдай.
Бұрынғының өлеңі,
Дегізетін шіркін-ай,
Қолға түспес жылқыдай.
Бұрынғының дегені,
Жас арудың деміндей
Бойға енетін шымырлап.
Бұрынғының дегені,
Өлмес өмір шөбіндей.
Іздеп жүрген тасбақа
Өмір бақи қыбырлап,
Тасбақа оны тапқанша,
Бар адамзат қырылмақ.
Жалықтырды жай жырым,
Қаламсабым сырылдап.
Шын қиналған кездері,
Бұрынғының сөздерін
Айтып жүрміз жырымдап.
О,өлеңнің киесі-ау,
Сөз шығады қай күні?
Дауысындай абыздың,
Көмейімнен қырылдап