Өлеңдер ✍️

Таң алды,
Таңды бетке алып
Ауылдан шықсаң аттанып,
Алыста...
Сары терезе
Сарғайып күтсе от жағып.
Дүние деген немене,
Қойыппыз бүгін көп жүріп.
Сарғайған сары терезе,
Жеткізер бір күн деп жүріп.
Жете алмай сол бір межеге,
Қалдық-ау, әбден болдырып.
Сапарда
Кеуіп кенезе.
Келемін тағы жол жүріп.
Сарғайған сары терезе,
Сен тұрсың әлі сендіріп,
Сол үйді жаным сағынды.
Біресе жағып шамыңды,
Біресе тұрған сөндіріп.
Сарғайған сары сартаңда,
Алыста көлік зырлатып.
Сарғайған әлгі саршамға,
Жеткенің түбі бір бақыт,
Жетпегенің де бір бақыт...