Өлеңдер ✍️

Оралмай жүрген жазым ең,
Таба алмай жүрген сазым ең.
Жолықтың маған ғайыптан,
Бұлбұлым жарқын наз үнмен.
Өзіндік сиқыр, сыры көп,
Дауысың неткен құдірет!
Жезтаңдай сендей әншіден,
Айналмаймын ба мың рет!
Сазымен тербеп тәтті әннің,
Жүрегіме өшпес от салдың.
Әніңе ғашық болам деп
Өзіңе ғашық боп қалдым.
Мендегі жылу, шуақты ап,
Кеттің сен ұшып бірақ та...
Көңілімнің гүлзар бағында,
Қалмадың неге тұрақтап?!
Арманым қайда кетті ізгі?
Іздеумен жүрмін әлі күн...
Аңсаумен жүрсін деп бізді
Қоспаған шығар тәңірім.
Кеудемді тербеп мың-сан жыр,
Сырлы саз аңсап тұрсам бір...
Ынтызар қылып әніңе,
Табынтып қойған бұл тағдыр.
Сырымды қалай естіртем?!
Сағынышымсың тек, білсең.
Қуанышым боп келіп ең,
Тәтті мұң сыйлап кеттің сен...