Өлеңдер ✍️

Көш келедi екi елдiң арасында,
Наласын да,
Жасырып жарасын да...
Бүгiн-ертең бiр тойдың болары анық
Ұлан-ғайыр қазақтың даласында!
Санам сазып, шексе де сарыуайым,
Тағдырыма несiне тарығайын:
Қайран, менiң қамкөңiл қазағым-ай,
Қара жерге шашылған тарыдайын!..
Сен қайғырма,
Босама,
Қамықпа да,
Алаңдамай, алдыңа анық қара!
Тағдыр желi соқса да қай тараптан,
Тарыға да,
Сыймайсың табытқа да!!!
Сен жылама,
Көзiңе жас алма, Елiм,
Жылайтындай, немене, осал ма едiң?!
Қай қиырда,
Жүрсең де қай қиянда,
Қазақ болып қаласың қашан да, Елiм!!!
Қазақ болып қаласың..,
Мен сенемiн,
Айналайын, ер Елiм,
Еңселi Елiм!
Әр тараптан,
Көш артып шартараптан
Атажұртқа тезiрек келсең едiң!
Шалқарыңа жамырап құйыл бәрiң:
Шалғайдағың,
Шеттегiң,
Қиырдағың!..
Сол емес пе Тәңiрден тiлегенiң?!
Сол емес пе Құдайға сыйынғаның?!