Өлеңдер ✍️

3аңғар, заңғар Зайсанның тауларына,
жауды ма екен бұл жауын,
жаумады ма,
қызғалдағы қыр қуып қаулады ма,
қыза шығып самалдың саумалына?
Қыз бiткенге қызғалдақ үлестiрiп,
Жеменейдiң жатқанда үнi естiлiп,
зеңгiр-зеңгiр Зайсанның шыңдарына
кетсем бе екен мен сенi iлестiрiп?
Кербез таудың керiлiп ақ маралы,
көкейiмде өзiңдей сақталады,
көп бояуға көзiңдi тұндырар ең
айыра алмай жүргенде ақ-қараны.
Ұлар құстың ұясын көрiп келiп,
бұлақтардың бұрымын өрiп берiп,
тастан тасқа еркелеп секiрер ең
елеңдеген елiкке серiк болып.
Жауған қарды көргенде тәңiр шыңға,
пайғамбардай қарарсың самырсынға,
тәкаппарлық төнгенде тұс-тұсыңнан
өр мiнездi мендегi танырсың да,
шатқалдағы мөп-мөлдiр шар айнадан,
өз жүзiңдi көргенде арайлаған,
бүлдiргенге боялған ерiнiңдi
тосқаныңды бiлмессiң қалай маған!