Өлеңдер ✍️

Сексеуілге «аға» дедім. Ол үнсіз
Тіл қатпастан тұра берді көңілсіз.
Тобылғыға «көке» дедім, түнерді,
Түсінеді мына мені кім енді?!
Қарт еменге «баба» дедім жүгініп,
Тұла бойы кетті-ау деймін үгіліп.
Құба жонның білгім келіп тағдырын
Қара жолдан қиғаш кетіп қаңғыдым.
Балбал тастар мен міскінге күледі,
Өйткені олар көне күнді біледі.
Дала мынау... ауыр ойдан қажыған –
Шипа іздейді көне күйдің сазынан.
Төрткүл дүние төнеді кеп төбемнен
Өзегімді өртеп тұрып өлеңмен...