Өлеңдер ✍️

Уһ, дүние-ай,
Мына өмірден шынымен кеткенің бе?
Бәрін тастап, шарықтап көкке мүлде.
Тіршілікте тартысты көп көріп ең,
Тыныштықты жансерік еткенің бе?
Кеткенің бе, шынымен тастап бәрін,
Өлгені ме, алаштық асқақ дарын.
«Қазақ» десе кешегі, бүгінгісін
Жазушы едің жол салып, бастап бәрін.
Кеткенің бе, мәңгілік оралмасқа,
«Бақыл болғын!» не дейін, одан басқа
Мен түгілі қазақтың маңдайына,
Сендей жан енді қайта жаралмас та.
Дүние-ай, мен не дейін одан басқа.