Өлеңдер ✍️

Бәрі маған жетеді, бәрі маған,
Шаңырағым, ошағым, жарым аман.
Қайнар бұлақ секілді қайран ғұмыр,
Тұнығынан шөлдесем қанып алам.
Әлпештеген атам мен анам да сау,
Әлдилеген бөпешім – балам да сау.
Сағынғанда еске алып, ой тербетіп,
Қиял құсын ұшырам алаңдасам.
Ағайын да, туыс та – аман бәрі,
Амандығы олардың – маған дәрі.
Мен өзімнің бойыма күш құямын,
Қасиеттен бар жақсы адамдағы.
Содан болар қасым жоқ, достарым көп,
Мені ешкім жеңе алмас босқа күндеп.
Кімге болсын тұрамын құлшынып бір
Жақсылықты жасап тек тастағым кеп.
Ағалар да жетеді мейірімді,
Білетұғын менің пәк пейілімді.
Жылыұшырай қараса олар маған,
Бұра берем мен-дағы зейінімді.
Ініден де ізгілік аямадым,
Ізет көрсем, келеді аялағым.
Адамдардың асығып ортасына,
Таң нұрымен таласа оянамын!