Өлеңдер ✍️

Ұстаз аға, құтты болсын жеңісің –
Алпыс алып жеңген ерге тең ісің!
Бес жүз дағы екі тоғыз мың сағат!
Құттықтаймын елге шашқан жемісің!
Тағы- тағы құтты болсын мерекең,
Алпыс жауды аттап өткен Керекем!
Мен санаған әлгі әрбір сағаттар –
Шәкірттерге берген білім –берекең!
Сол білім ғой түннен таңға сүйреген,
Сол білімнен құлдық, күңдік күйреген,
Сол білімді қару етіп қолына,
Шәкірттерің майданда жау түйреген!
Ленин дана ұлы ұстаз, шәкірт -Сіз,
Эстафета сізден алар шәкірт – біз!
Көп жасаңыз, сау болыңыз Керекем,
Эстафета ауысар жас болсын жүз!
Сіз өсірген түлкібастық түлектер,
Ала келді елден сәлем, тілектер,
Алпыс жасқа арымаған ұстазым,
Жүз жылда да жүдемесін жүректер!
Осы тілек, осы сәлем елімнен,
Еңбегіңіз жеміс шашқан жеріңнен,
«Жүзіңнен де әлі-ақ жүзіп өтем» деп,
Бір уәде әкел деді Керімнен.