Өлеңдер ✍️

Бөліскен қайғыны, бір үзім нанды,
Әлемде адамдық Достықпен мәнді.
Ғашықпын өмірге дос сезім үшін,
Достықтан басталған махаббат мәңгі.
Жаныңды арнаған пейілің үшін,
Сыйлайын мендегі жалғыз-ақ жанды!
Жарты сөз айтпай-ақ бір-бірін ұққан,
Кім мықты тірлікте дос деген жұптан!?
Жан-тәнің, мәніңмен өрілген сезім,
Шын досы бар адам ол –нағыз Сырттан!
Бірліксіз тірліктің Бақыты бекер,
Ақпейіл, кеңшілік барлығын ұтқан.
Санаң мен жүректің дүрсілі бірге,
Сырсандық ішінде күрсіні бірге,
Жан досым, қанының құрамы басқа,
Өзіңсіз бұл өмір – қақпасыз түрме.
Көрсек те не жағдай, жұмақ не тозақ,
Сыңарым, тұмарым,жүрші Сен бірге.