Өлеңдер ✍️

Басымда тұр тағдырдың айбалтасы,
Жұтар екен қай күні қай қалтасы?!
Пенде едім ғой тәңірдің көмегімен
Кейде өрге өрмелер сайтан тасы!
Босағамда жүргенім он жеті күн,
Бүтінделіп болған жоқ кем-кетігім,
Ұзақ жолдың үстінде тағдырымның
Тапқандаймын бұзылған мен тетігін.
Енді мықтап өмірде түгелдерім:
Жолда қалған ер-тоқым, жүгендерін,
Сұлу торат секілді сонан кейін,
Байқап қана басу ғой жүрер жерін.
Оқыс өліп кетпедім Құлагердей,
Қинап жанды бас-көзсіз ұра бермей,
Бас қоймастан әуелі дүрмектерге
Жүрген жақсы – қалғанға мұрагердей.
Екі айналып дүниенің келмесіне,
Көз жеткен соң екі рет өлмесіңе,
Екіленбей ой бағып кіріп шықшы,
Тарих-шалдың жасаулы бөлмесіне!
Көтерулі тағдырдың айбалтасы,
Тарих-шалдың күтіп тұр қай қалтасы!
Байғұс қалпы өтем бе бұ дүниеден
Қозғалмаған ғұмыры сайдан тасы.