Өлеңдер ✍️

Аунақшып тұр ауа мен жел,
Ойнақшып тұр күн жанары.
Сансырайды сары белдер,
Сырбаз таулар сызданады.
Сары белден құйын шықты,
Сары топырақ көкке атылды.
Шеткі ауылдың үйін жықты,
Шырылдатып көп катынды.
Құйын алды күлді, көңді,
Қойлыбайдың шұлғауын да.
Сұрп асылдар қолды болды,
Сұрапылдың шырмауында.
Таз үйінің қонағы еді,
Тасыр құйын құтырған-ау...
Қайран біздің қазақ елі,
Осындайдан құтылмады-ау.