Өлеңдер ✍️

Құрсын бәрі!
Отырайын обломовша омалып,
Ойдан ада, сезім-түйсік тоналып.
Не шалқамнан сұлап түсіп жатайын,
Қоңданып жон, аунап-қунап оңалып...
Деп ойлайсың шаршап келіп жұмыстан,
Қажып-талып күйкі тірлік, тұрмыстан.
Митың-митың қозғалыстан жалығып,
Жек көресің қу жалғанды зымыстан.
Бәрібір сен тыныш жата алмайсың,
Өткен күннің әрбір сәтін талдайсың.
Мазалайды тосын түйткіл жүректі:
Ертеңгі күн күтпек алдан қандай сын?
Талақ етіп ызы-қию жиынды,
Жөн көрсең де дамылдауды тиімді:
Қақтығысып электрондар, протондар,
Шұқылайды, түрткілейді миыңды.
Қымтанып ап, өшірсең де шамыңды,
Қанша күтпек болсаң да сен жаныңды:
Беймаза ғып жасушаңды, тініңді,
Кварктер ойнақтатар қаныңды.