Өлеңдер ✍️

Талапты бала тайсалмас,
Жүректі бала жасқанбас.
Қанеки, Мағди, тәй-тәй бас,
Қанеки, Мағди, қаз-қаз бас!
Жарқын жаз ақ жол басы боп,
Төгілді Күннің шуағы.
Аллажар болсын, разы боп
Қыдырбай атаң аруағы.
Болма сен жалқау, еріншек,
Шапқылап жөнел, құлыншақ.
Күтеді алдан Келешек,
Күтеді алдан Болашақ.
Іске асып Әжең арманы,
Азамат болып қалыптас.
Бол ертең елдің ардағы,
Жолыңды таңдап, танып бас.
Қатарға қосыл, жүгір де,
Жігерлі бала жалықпас.
Кездессе бөгет – сүрінбе,
Ақырын жүріп, анық бас!