Өлеңдер ✍️

Тіршілік үшін бір күндік
Түстім-ау әуре-сарсаңға.
Титықтап барып түңілдік,
Тұрғандай тозақ қарсаңда.
Заманның күтіп ақырын,
Алаңсыз жүру мүмкін бе?
Пендедей қалған мақұрым,
Пәс болар тіпті күлкің де.
Табанда болды ғалам жат,
Танытып оқыс шын сырын.
Тия алмас бүкіл адамзат,
Табиғат-тажал тылсымын.
Бұйырған мерзім тапшы тым,
Бес-он жыл қалды небары.
Алаулы отын шапшытып,
Асау күн төкті қаһарын.
Болмады бекер секем бұл,
Таяпты заманақырың.
Жер-бесік болса мекен тұл,
Күн көрмек қалай пақырың?!
Тұрған Күн көкте жарқырап,
Атылса – тірлік не болмақ?!
Құлдары тұрса шарқ ұра,
Сақтаса, сақтар тек Аллаһ!