Өлеңдер ✍️

«Ол, мейлі, некелі немесе байсыз ба,
Құрықты салсаң да қай әйел, қай қызға,
Бауырым, шашыңды ақ қырау шалыпты,
Білмедім, үйдегі қатының жайсыз ба?» –
Деп досым, аңдамай кеудемнен жасынды,
Ентелеп құшақтап әңгелек басымды,
Әзіл-шын аралас сынға алды оңдырмай
Отызға жетпей-ақ ақ түскен шашымды...
Ауасын сіміріп, жүрген соң нанын жеп,
Туған ел бағы үшін өртенсін жаным бек.
Азамат алжымас қатынның сорынан,
Шын еркек қажиды халқының қамын жеп.
Бойымда түгел ғой бар мүше, бар дене,
Басымды қатырып, елітпе әрнеге.
Елі үшін шаш беру сөз бе екен еркекке?
Қазақтың қамы үшін бас берген Хан-Кене!..