Өлеңдер ✍️

Атса да ақ шарапқа қанып таңым,
Мен– табыттамын,
Табыттамын!
Құдай-ай, арзан қолмен бальзамдалып,
Көрмеге қойылыпты-ау шабыт тәнім.
Ендігі сорлысы да қарап маған,
Мазаққа айналады мадақ толы ән!
Туғанннан түк көрмеген
құл-құтандар
Жабайы күй кешеді алақтаған...
Құнымды білмегесін қара ғасыр,
Кіл тобыр келіп алып салады асыр.
Патшалар өртенетін жанарыма
Ақындар жаңбарлатып тамаша жыр
Жарты әлем басын иген асқақ едім,
Перғауындар, пәршалап таста мені!
Қайран мүсін
Қор болып жатыр мұнда
Бір кездері әлемнің ашқан өңін.
Ендігі бейшара да төніп маған,
Өліп-талған шайтанын көріп қалам.
Бұл ғасырдың патшасы
Цезарь емес!
ХХ-ғасыр ешкімнен қорықпаған.
Атса да ақ шарапқа қанып таңым,
Мен– табыттамын,
Табыттамын!
Құдай-ай, арзан қолмен бальзамдалып,
Көрмеге жерленіпті-ау шабыт тәнім...