Өлеңдер ✍️

Кеудемді аршып дақтардан,
Сызданған шерді мүлгітіп.
Мән іздеп жазған хаттардан,
Кетердей кенет тіл бітіп,
Отырғанымды қайтерсің?!..

Көкейге жағып отты арман,
Тәп-тәтті мұңды ұнатып.
Әлекке түскен шоқтардан,
Жүректі әнмен жұбатып,
Толтырғанымды қайтерсің?!..

Санамды уайым басқанмен,
Сезімнің іліп тұнығын.
Сырласып түнгі аспанмен,
Жұлдыздың ерке қылығын,
Ұғынғанымды қайтерсің?!..

Самалға соққан мұң айтып,
Өзімді-өзім жиі алдай.
Сағыныш үнін ұлғайтып,
"Қош"- деуге,есім қия алмай,
Бұғынғанымды қайтерсің?!..

Ұғына тұрып жалынға,
Ұрынғанымды қайтерсің?!..

Жанар Ешназар
21/04/22ж