Өлеңдер ✍️

Кім мәңгілік,
Шынында, кім өлмейді?
Сені де өмір алысқа жібермейді.
Жиған байлық, дүние қалар бәрі
Түгендеп бір кетсең де түгел мейлі.
Бірің қусың,
Бірің от,
Бірің жасық,
Бірің дұшпан,
Бірің өш,
Бірің ғашық.
Білмей қалу түк те емес бір-біріңді
Дүние үшін жүргенде ырылдасып.
О, қайдасың бауырым, дос, аяулым,
Өз-өзіңнен сен қашан босай алдың?
Кімге қандай жамандық істеп едің,
Кімге қандай жақсылық жасай алдың? –
Сол болады мәңгілік жолдасың да,
Туғаның да,
Барың да,
Жан досың да,
Не істей алдың сен өзің өміріңде –
Өлгеннен соң құлпытас сол басыңда.