Өлеңдер ✍️

Кездесерміз,
Кездесерміз біз әлі,
Жастық күні әлі талай қызады.
Жүрегімді бірақ менің мұздатар
Біреулердің саған құрған тұзағы.
Мейлі асықпан,
Күндер егер асықса,
Оған да мен мұңданбаймын жасықша.
Көгімізді тұрған біздің күңгірт қып
Көңілдегі бұлттарың да уақытша.
Жастық шақта алау керек,
От керек,
Жауын керек жіберетін төкпелеп.
Дауыл керек ұшыратын барлығын,
Жатсын желге салмақсыздар өкпелеп.
Кездесерміз,
Кездесерміз біз әлі,
Жақсы болар,
Жаман болар халіміз.
Тек, әйтеуір, біреулердің алдында
Сынбаса екен сағымыз бен бағымыз.
Сау бол менің ерке сылқым күндерім,
Сенің арқаң серілік қып жүргенім.
Қоштасарда жатырқамай,
Жатсынбай
Сен де аяулым, құшағыма кір менің