Өлеңдер ✍️

Бала едім онда әлі мен,
Таныстым қала халқымен.
Орыстың таза жанымен,
Дәстүрімен салтымен.
Жақындау барып тартынбай,
Аймалап жылы жүзінен.
Ұнатып шашын алтындай
Таныстым ерке қызымен.
Дәл ондай қызды көрмедім,
Бәрінен елдің сүйкімді.
Түсіме кіріп ол менің
Бөлетін болды ұйқымды.
Құлазып көңіл даласы,
Кетті ол бала жанымен.
Воронеж жаққа ағасы
Ауысып жұмыс бабымен.
Көшеміздің де көркі еді,
Алтындай алып тұлымы.
Мінезі ашық ерке еді,
әдемі еді қылығы.
Ол болса көркін бұлдамас,
Балалық бал күн жоқ енді.
Ол енді қазір тыңдамас
Мен арнап жазған өлеңді.
Тұратын күліп жолымда,
Ойласам бөлген ұйқымды.
Ал маған ыстық оның да
Балалық шағы сүйкімді.