Өлеңдер ✍️

Жесір желдер желігіп желген кеште,
Ойға сезім айналды жөн бермеске.
Он бесінде толған Ай толықсыған
Сен де он бесте,
Құралай,
Мен де он бесте.
Көмкерілген көктемім нұр арайға,
Көк көйлегін көңілдің мұң орай ма?
Жаңаарқаның жазира жазығында
Кұралайлар өретін құралайда.
Кездесіп ек...
Шын ұқсап шырақтыға,
Жылжып аққан жылдарың жылатты ма?
Мына жалған тұңғиық теңіз болса —
Тұна қалған екеуміз бір-ақтұма.
...Ақ сәулені жан-жаққа қуып кетіп,
Шаңырақты түзедік,
Уық бекіп.
Мұңды реңін қалыпты,
Сезімдерің
Сүмбіленің суыңдай суып кетіп.
Көз алдымнан көктемде кешкен ағын,
Он бесімде лаулаған
Өшпе, жалын!
Елік күннің естісем ескен әнін
Еске аламын мен сені,
Кеш қарағым...