Өлеңдер ✍️

Төбел арай төбеге төркіндейді,
Таң тонасын тамыздың
Көркін мейлі.
Жапыраққа ілінген жалғыз тамшы
Жанардағы жастай боп мөлтілдейді.
Күрсінгенде күмілжіп күз реңі,
Сүреңсіздеу сүмбіле сүзіледі.
Жапыраққа ілінген жалғыз тамшы —
Демі бітсе үн-түнсіз үзіледі.
Тұнық сырдың тұңғиық тұмасындай,
Өміріңнің өрнектер жыры осындай.
Жапыраққа ілінген жалғыз тамшы.
Түнгі нөпір нөсердің мұрасындай.
Жасын кешкен жанымның жарқылы —
Жыр,
Алды уайым тірліктің,
Арты дүбір.
Жапыраққа ілінген жалғыз тамшы
Маңдайыма жазылған жалқы ғұмыр...
Сайрар кезде сайрасын тоты бақта,
Торықтырма,
Тонама,
Тоқыратпа!
Жалғыз тамшы ілінген жапыраққа
Үзіледі...
Сіңеді топыраққа...
Арайларын Арымның аршыды нұр,
Сал,
Сал дәурен,
Сал дәурен,
Салшы дүбір!
Жалқы жыры жалғанның жанымдағы
Жапыраққа ілінген тамшы-ғұмыр!.