Өлеңдер ✍️

Камазға жолда соғылып жатыр арғымақ,
Күн көріп жүрген өз даласында қаңғып-ақ.
Тұлпарды ердің қанаты деген бабаның
Болған ба сөзі сандырақ?
Шықпаған жаны, жанары жатыр
мөлтеңдеп,
Тәңірден тілек тезірек, шіркін, өлсем деп.
Совхоздың мүлкі ол, ие жоқ іздеп келетін
Бауыздасам деп, көмсем деп.
Қираған жамбас, үгіліп кеткен қабырға,
Тоқтамай жүрек, қан жүріп жатыр
тамырда.
Тұяқты малды қастерлеп өскен халықтың
Құлқы жоқ тұлпар бағуға.
Даласы тозды, қызғалдақ беткей
құлпырған,
Азайды малы жеке шаруасын тындырған.
Трасса біткен зулаған темір машина,
Ойпатын тескен шет елдік темір бұрғылар.
Аққу мен қаздар азайып кеткен көлінде,
Азайтып алды ителгі, қыран тегін де.
Елі мен жерін қорғаған тұлпар тұяқтар
Машина қағып өлуде.