Өлеңдер ✍️

Көргенде бәйге алаңын,
Жанатын оттай жанарың.
Жасыңнан жүйрік табанға
Құлығын жақтың даланың.
Кеш туса-дағы азат күн,
Қол соқса да жұрт аз-ақ тым.
Әлемге аян тұғырда
Баласы тұрды қазақтың.
Сағынып дала самалын,
Ішінде бөтен қаланың
Бір ұлы жүрді қазақтың
Көтеріп спорт жалауын.
Еске алсаң құмның дауысын,
Үдеді әр кез шабысың.
Алқынтып алау жүректі,
Қорғадың елдің намысын.
Солай бір дәурен кештің де,
Шыңдалып өзің өстің бе?!
«Бауырым, мені қорға» деп
Жалынған жоқсың ешкімге.
Көреді халқым әлі деп,
Көңілде үміт жанып ед.
Жолыққан, Әмин, өзіңе
Жасасын бүгін Әділет!