Өлеңдер ✍️

Шыңдағы еріп ақ қар да,
Өзендер тасып жатқанда.
Талдары жаңа бүр ашқан
Сені іздеп бардым бақтарға.
Қырларда қызыл-жасылды
Ізіңді гүлдер жасырды.
Көктемнің қоңыр самалы
Сипады сен боп шашымды.
Қиял боп мені жүдеттің,
Бұл күнде ойды жыр еттім.
Барады сыймай кеудеме
Сағыныш күйі жүректің.
Қанаты талып шаршаған
Аққудай көлін аңсаған.
Жетер деп даусым өзіңе,
Оңаша қалып ән салам.
Таң болып келсең ағарған,
Жүзімді көрсем жанардан.
Жайғанда құшақ кеудеңе
Маңдайды сүйеу – бар арман.