Өлеңдер ✍️

Сеніп айтқан сырыңды айтып қойдым мен оған,
Қарақшыдай болдым-ау сеніміңді тонаған.
Сенің нәзік жаныңның буырқанған ағынын,
Жүрегіңнің жалынын ұқса деп ем сол адам.
Көрсе деп ем сол адам көңіліңнің көктемін,
Жарқыл ойнап жаныңда, жаңбыр құйып өткенін.
Енді бүгін отырмын өкінішке өртеніп,
Бәрі орынды досыңды айыптауың, сөккенің.
Көрсем деп ем мен сенің күліп жүрген шағыңды,
Айықпады-ау ащы мұң торлап алып жаныңды.
Толқынына сезімнің жүрсің бе әлі тұншығып,
Аямады-ау долы жел қорғансыз ақ қайыңды.
Махаббатсыз қызықты атпайды екен құба таң,
Алтын құрбым, не дейін, қалай сені жұбатам?
Қара түндер, бір сәтке қабағыңды түсірші,
Шындықты айтам бетіңе, бүгін сені жылатам.
Мұңаймашы, құрбыжан, әлі-ақ қайта көктейсің,
Бақыт деген түлкі ғой, кейде қуып жетпейсің.
Бір тілегім осынау қайта оралмас өмірден
Ғашық болып өткейсің,
Ғашық болып өткейсің!