Өлеңдер ✍️

Мен бүгін күлуден бір шаршамадым,
Жайраңдап сен де отырдың, аңсағаным.
Сан күнгі сағыныштың өтеуіндей
Бақыттың бөліп іштік бал шарабын.
Арада өкпе-реніш болмағандай,
Көңілдер де өзге күй толғағандай.
Отырдық біз алаңсыз екеуара
Ортақ бір қуанышты тойлағандай.
Жанарыңнан ақшуақ арай көрдім,
Жадыраттың,
Көңілім қаяулы еді.
Өткенді де ұмытып, өкпемді де
Көз ала алмай жүзіңе қарай бердім.
Тастадым да ысырып шетке мұңды,
Қызықтадым балауса көктемімді.
Кірбің салып қайтейін қабағыңа
Көріп едім селт етпес сәттеріңді.
От ойнатып сезімге күлімдедің,
Құшағыма қысып ем, дірілдедің.
Аспан жерге айналып бара жатты,
Құшағымда сен тұрдың, күнім менің.