Өлеңдер ✍️

Тағы да шықтым сапарға,
Қара жол қарсы ағады.
Ақ дала, аппақ атандар
Бұлдырап қалып барады.
Ақ арман сынды арайлы
Ақ үйлер шықты алдымнан.
Ақ сапар тілеп қарайды
Ақ басы Алатаудың да.
Армысың, далам, бұйығы
Жал-жал боп жатқан шағылдар!
Қай жақтан сені суырып
Әкелді қара дауылдар?
Тойымсыз аптап ыстықтан
Таңдайың қанша құрғады?
Бабамның жасын қыстыққан
Жұттың ба сонау жылдары?
Шығандап бір рет шырқауға
Тұқыртып ерік бермеген,
Сонау бір қара тұлпар ма
Босанып шыққан кермеден?
Көңілім кетті-ау елжіреп,
Қараймын қалай езілмей?
Көлдерің жатыр мөлдіреп
Бөкеннің бота көзіндей.
Шыққын деп маған тұр қырат
Кетемін қалай бұрылмай?
Өзіңе келдім шұрқырап
Адасып қалған құлындай...