Өлеңдер ✍️

Тынбай тұр мынау жылап күн,
Көктемнің сиқы – былғаныш!..
…Қалтырап тұрған құрақтың,
Болмапты-ау бойы бір қарыс.
Жел бұлтқа –
«Шүу, шүу, шүулейді»,
Шығысты бетке ап үдеріп.
Көкектің күні гулейді,
Қабағын ашпай түнеріп…
…Найзағай-қылыш жарқ етіп,
Тігісі көктің сөгілді.
Бұтақ-бесігін тəрк етіп,
Өріктің гүлі төгілді…
Жаңбырдан үстім малмандай…
Мұңайған жалғыз бір мен бе?
…Тапталып қалған армандай,
Қараймын аппақ гүлдерге.
Жандының бəрі у-шумыз,
Жауратқан күннен түңіліп.
Жер ғана жатқан үн-түнсіз,
Көз жасын көктің сіміріп…