Өлеңдер ✍️

Ұрпаққа дарып жүрсін баталарың.
Ел едік сыйлайтұғын үлкендерін,
Кеше көр болса егер қателерім.
Ардақты айдын көлдей аналарым,
Ыстықта, суық көрсем паналарым.
Ананың мейіріміндей мейірімді,
Іздесем қайдан ғана таба алармын.
Ардақты алтыннан да ағаларым,
Қымбат қой бір мен үшін бағаларың.
Өмірде сыйласуға не жетеді,
Келеді жақсы ағаны жағалағым.
Салмақты күмістен де жеңгелерім,
Ағадан сізді қалай кем көремін.
Ағаның мінін айтып мінездерін,
Əзілде мені талай жеңген едің.
Аяулы əпкелер, жездекелер,
Сырласар өздеріңмен кез де келер.
Көтермес өмір кейде қалжыңыңды,
Иықта жүктерің бар тең көтерер.
Қашанда қарындасың бір тіреуің,
Тəңірден сендер үшін шын тілеуім.
Өмірде өкінішпен жылап жүрмей,
Ылғи да естілсін күлкілерің.
Аяулы арттан ерген бауырларым,
Болыңдар қорғасындай ауыр бəрің.
Жеңілді жел əкетер қаңбақтайын,
Өмірдің көрмей жатып дауылдарын.
Ата-ана, бала қызық, бала бағың,
Сынбасын сол баладан көңіл сағың.
Сынаптай бала жаны қолға тұрмас,
Тынбасын тəрбиеден тіл мен жағың.
Өмірде түсініскен өзің жарым,
Сен барда болмайды еш көңіл жарым.
Байлықты, басқаны мен не қылайын,
Қосылып шырқай берсең өмір əнін.
Кірлемей бүтін жүрсе жеңім, жағам,
Еңбек те жазылмай ма саған таман.
Өсірсек тəрбиелеп жарамды ұрпақ,
Тіпті де арта түсер сенің бағаң.
Қымбатты бір мен үшін туыстарым,
Бір қолмен берекеде ту ұстағын.
Өмірде бір көңілден қымбат бар ма?
Туыстар бір-біріңнен суыспағын.