Өлеңдер ✍️

Арман əнін кім бар айтып тауысқан,
Күтуменен ғасырларда ауысқан.
Осы бір күн ұмытылмас мəңгіге,
Аңсап келіп атажұртпен қауышқан.
Қайырмасы:
Жүрсем дағы өз қойныңнан жырақта,
Ұмытқам жоқ мен өзіңді бірақ та.
Тілектеспін, жүректеспін өзіңмен,
Жету мақсат ортақ ұлы мұратқа.
Жан құмарым мейіріңе қанбаған,
Жазылар ма пейіліңнен жан жарам.
Тілегімді жүрегіңе жеткізсін,
Еміреніп, тебіреніп салған əн.
Бір үмітті көріп сенің көзіңнен,
Сол үмітті бақытым деп сезінгем.
Басқа жақтан таба алмаған жоғымды,
Іздеп келдім, іздеп табам өзіңнен.