Өлеңдер ✍️

Өмір жолын жүргеніңде бағамдап,
Оңайлықпен келе қалмас саған бақ.
Қайшылықтар кездескенде кетілмей,
Қасқайып тұр қаймықпастан табандап.
Өмір жолын жүрген сайын қиялап,
Кездессе де қырсықтар мен қиянат.
Жүрегіңнің жандыр отын жасқанба,
Көңіліңе үміт сенім ұялат.
Өмір жолын жүрген сайын үдіре,
Ауырлайды арқаңдағы жүгіңде,
Шын өмірге шыдай алмай тайсақтап,
Еңсең түсіп көкіректен бүгілме.
Өмір жолы даңғыл емес сан бұраң,
Дұшпаныңды шалса аяқтан аңдыған.
Сүрінсең де жығылсаң да өмірде,
Тұра салып жүгіруге дағдылан.
Кездескенде бір ылдиға, еңіске,
Ойқой міне жеттім деме жеңіске.
Бір еңістің бір өрі бар алдыңда,
Сол биіктен өліспей сен беріспе.
Іздегенің рас болса шын бақыт,
Өрден биік қарлы тауға шыңға шық.
Ол үшін сен «альпинист» бол алдымен,
Тым биікте, тым биікте шын бақыт.