Өлеңдер ✍️

Жан байлығым ортаймас əн байлығым,
Қанаттанып ұшқандай самғап бүгін.
Сондықтан да жаныма дарытпаймын,
Уын жаяр бойыңа қам-қайғының.
Артқан сайын өмірге құштарлығым,
Дүниеге жоқ менің іштарлығым.
Жүрегіңді тырнайтын аш мысықтай,
Іштарлықтың білемін дұшпандығын.
Өкпе жүрмес Тəңірдің бергеніне,
Ризамын ағайын сенгеніңе.
Он үш жаста мен өлген бала едім,
Бұл күнге де тəубе етем келгеніме.
Қайдан білсін өмірде түк көрмеген,
Тəтті ұйқыда қорқыныш түс көрмеген.
Өмірінде бір өліп, бір тірілген,
Мен үшін тек бір бақыт күн сөнбеген.