Өлеңдер ✍️

Бәрін бағып, бәрін байқап жанары,
Біріне мұз, біріне күн қабағы
Бола жүріп, тигізбей тіл орағын
Әйел болу оңай емес, қарағым.
Бәрін көріп, кейде болып көрмеген,
Бәрін біліп жүрсе де боп білмеген.
Әрнәрседен үзіп алмай хабарын
Әйел болу оңай емес, қарағым.
Бәрі жақсы сырттан байқап тұрғанға,
Барлығы бар, қажет еткен бір жанға
Шайқап алмай бақытының шарабын,
Әйел болу оңай емес, қарағым.
Бір қолынан нәрестесі ержетіп,
Бір қолымен жер-әлемді тербетіп,
Бауырында – тыныштықтың аралы.
Әйел болу оңай емес, қарағым.
Құрсағында адамзатты көтерген,
Құшағында махаббаты өтелген.
Әйел деген – құдірет қой, құдірет
Бізді өмірге әкелетін бір рет.