Өлеңдер ✍️

Өткенімнің бәрі бүгін ескірді,
Түпкірінен жүректің үн естілді.
Қайталанған жылдар бойы бір өшпей,
«Тағдыр» екен оның атын кеш білдім.
Не көрмедім теңізінде өмірдің,
Талай долы толқынына көмілдім.
Жету үшін бақыт деген аралға,
Тағдырымның арбасына жегілдім.
Қайран жастық түс сияқты әдемі,
Өте шықты көптеу болып әлегі.
Махаббаттың бір сырқаты аты оның –
Тағдыр екен, табылмайтын дәл емі.
Бақ жұлдызың жана ма әлде, жанбай ма?
Татыса өмір бал не кермек таңдайға,
Төзесің де мойындайсың амал жоқ,
«Тағдыр ғой»,- деп жазылғаны маңдайға.