Өлеңдер ✍️

Ажырасып жатыр ерлі-зайыпты,
Бірін-бірі түсінбеуін айып қып.
Біраз жылдар ұстап келген шайқалтпай,
Шаңырақтың бақ-тіреуі тайыпты.
Ажырасып, талақ етті бір-бірін,
Сонша жылғы еңбегі мен тірлігін.
Бір кездегі табыстырған екеуін,
Махаббат та мазақ болып жүр бүгін.
Ажыратып сот міндетін атқарды,
Шаңырақ та, кереге де тапталды.
Екеуінен жаратылған баланың
Жүрегінде жазылмайтын дақ қалды.
Ана аяулы, әке қымбат одан да,
Сот үкімі басты үшеуін табанға.
Сәби жүрек тұншығады, айта алмай,
Кетіп бара жатқандай боп боданға.
Бәрі бітті.
Кетті бәрі бетімен,
Суып, жат боп шыға келді шетінен.
Сәби ғана қиналады әкесін
Сағынғанда ет кескендей етінен...