Өлеңдер ✍️

Біреу тартып алатындай үлесін,
Ештеңеге асықпаймын білесің.
Мен асықсам, саған ғана асығам,
Сарыарқада соққан желге ілесіп.
Жайып тастап көңілімнің желкенін,
Жер қозғалса қозғалмаймын мен тегі.
Мен асықсам, саған ғана асығам,
Жалғау үшін арманымның өркенін.
Мені ешнәрсе алаң ете бермейді,
Топан суың тобығымнан келмейді.
Мен асықсам, саған ғана асығам,
Сахарадай саған жаным шөлдейді.
Жүрегімнің қуырып бар танабын,
Саған қарай алып-ұшып барамын,
Миллиондаған адамдардың ішінен
Сені ғана танып тұрар жанарым.
Төзімді едім, сабырлы едім бір жандай
Мазам кетті жалғыздық кеп ұрғандай.
Сені тауып бұратпасам кілттерін,
Күллі дүнием иесіз боп қалғандай.