Өлеңдер ✍️

Сұп-суық болып кей-кейде,
Сөйлескің келмей ешкіммен
Жүргенде сендік «гөй-гөйге»
Үндемей ғұмыр кештім мен.
Абайдың өзі күйгеннен,
«Дерт»,- депті сөздің өнерін.
Бір кезде мені сүйгенмен
Білгенмін «дерттің» жеңерін.
Құлы боп ойдың сарқылмас,
Өзіңмен-өзің жүресің.
Жазудан басың артылмас,
Жаратқан беріп үлесін.
«Ауырлау,- дейсің,- мінезім»
Қаламай думан-дүрмекті.
Бір кітап болып бір өзің
Оқшаулау жұрттан жүрмексің.
Келістім, бірге өзіңмен
Тып-тыныш өмір кешуге.
Қарсы алып бәрін төзіммен
Шынардай көктеп, өсуге.