Өлеңдер ✍️

Адамдықтың бұзамын тас қамалын,
Жүрек сатам!
Қалмады басқа амалым.
Қалжырадым, түңілдім барлығынан.
Бағамын деп заманның қас-қабағын.
Әкем анау –
Кеңестің қара құлы.
Бүгінде – сал, қәдірсіз бала құрлы.
Шешем сорлы,
Тірліктің қамытынан
Жүрегін де, білегін жара қылды.
Қайран жарым,
Ақ үрпек балапандай,
Сүйкімді едің өсірген алақанда.
Түте-түте болыпсың асылым-ай,
Көпшіл едің, айналып қарақанға.
Жансерігім,
Жайнайтын кезің еді.
Запыраны заманның сезіледі.
Қарап тұрып өңіңе шүберектей
Қан жылайды жүрегім езіледі.
Ерке қызым,
Жарығым, жазығың не?
Арналады жүректің назы кімге.
Қалай тоқтау қоямын бағыңды аш деп,
Билік айтқан жастыққа қазы күнге.
Жалғыз ұлым,
Тұяғым артымдағы.
Жан әкеңді ит өмір алқымдады.
Сен мақтаныш етердей бола алмадым,
Менен саған дәулет те артылмады.
Тар пәтерден
Бір кезде әкем алған,
Шыға алмадық қайтейін, дүние жалған.
Бақытты еткім келгенмен өздеріңді,
Байлық жинай алмадым, аттап ардан.
Отыз сегіз жыл болыпты мен туғалы,
Азамат-ақ жігітпін, ер тұлғалы.
Жаным дала-даласы шыққанымен
Жүрегімде сызат жоқ серпімді әлі.
Жалғыз жүрек,
Болып тұр саудаларым.
Соны сатам, сұрамай сауға жаным.
Соны сатам, жанұям сендер үшін!
Жауынгердей лақтырған жауға барын.
Жүрек сатам!
Алсаңдар армансызбын.
Мүшесі екен демеңдер қорғансыздың.
Осы жүрек, Отанын отбасымен
Адал сүйді шыңында жалған құздың.
Адал болды досына, қасына да,
Не қиындық көрсе де жасымады.
Тек саудаға түсіп тұр қайран жүрек,
Түпкірінде шырқырап ғашық әні.
Жүрек сатам,
Аманда Ай-Күніміз.
Бұрын мұндай көрмедік қайғыны біз.
«Адам және өмірі»,- депті Ата заң,
Мемлекетте теңдесіз байлығымыз.
Десе қайтем,
Жоқ болса басқа амалым.
Еркек тоқты құрбандық жастанамын.
Менің мынау мейірбан жүрегіммен
Бақытты болыңдаршы басқаларың.
Ана – ауру,
Әке – сал,
Жарым – нала.
Сыз үйде күркілдейді екі бала.
Мен жалғыз тырбанғанмен болар емес,
Күшігінен таланған шықпас дара.
Сондықтан сатам жалғыз тірегімді,
Құрбан ғып отбасыма бір өмірді.
Ақшалы ағатайлар, алыңдаршы,
Адамдарды шын сүйген жүрегімді.
Ақшалы ағатайлар, өздеріңде
Бәрі бар, өмірді енді көздедіңдер.
Өзгенің маңдай тері тамған жерде,
Жүрегі соғып тұрсын өзгенің де.
Ағалар алмастайын жарқылдаған,
Алыңдар жүрегімді аңқылдаған.
Кеудеңде соғып тұрып сол ақ жүрек,
Орнатсын ортаңызға алтын заман.