Өлеңдер ✍️

Жыр жазғым келеді,
жыр жазғым,
шуағын жиып ап бір жаздың,
шаттанған жандармен бір шалқып,
мұңайған жандармен бірге аздым.
Жыр жазғым келеді күлімдеп,
бір күннен артық бір күнім деп.
Кеудесі орденге толғандай,
тамаша жұлдызды түнім деп.
Жыр жазғым келеді жүзімдей,
мөлдіреп тұрар сәл үзілмей.
Көзіндей жайнаған жастардың,
ып-ыстық жарымның жүзіндей.
Жыр жазғым келеді аспанға,
сыр іздеп караймын тастан да.
Жас ақын секілді лепірем,
ер жасы– елуден ассам да.