Өлеңдер ✍️

Бірге өскен жандар қайда бұл күнде,
бірге атқызған таңдар қайда бұл күнде.
Соны ойласам,
теңіз күлкім тартылып,
сап тиылды-ау көп төгілмей бұл күнде
Қайда олар,
кімдерменен жүр екен,
кімдерменен мұңы, сыры бір екен.
Соны ойласам,
шырт ұйқыдан шошып бір,
оянғандай,ой, аллам-ай, дір етем.
Көп толғанам кеудемді ойға талдырып,
көзіме де ып-ыстық жас алдырып.
Таңғы нұрдай тарқап кетті қайда олар,
кең дүниеде мені жалғыз қалдырып.
Оттар қаптап бықсып, жөнді жанбаған,
көкірегімде былдырлайды аңғал ән.
Басы тәтті басталған бұл тірліктің,
соңы қатты бітеріне таңқалам..