Өлеңдер ✍️

Ей, ардақты анасы үш баламның!
Есіңде ме мен белден ұстаған күн?
Қараң қалған күн болып көрінетін
Маған сені сүймеген,
Құшпаған күн.
Сен – үйдесің,
Мен енді тысқа алаңмын,
Шықтым талай ішінен қысталаңның.
Кеттім талай тісінде тістегеннің,
Кеттім талай қолында ұстағанның.
Мұқалсам да жүзіндей ұстараның,
өзің барда мен әлі ұшталамын.
Болсын десең дұшпанға жүзің жарқын –
Жүру керек қасында күшті адамның.
Қарындаштай көп жазған – қысқарармын,
Бір күн өмір легінен тыс қалармын.
Сен аман бол – тірегі үш ғаламның,
Ей, ардақты анасы үш баламның!