Өлеңдер ✍️

Зәулімдерді теңселтіп шыбық талдай,

Өкпе, назын ішіне бұғып қалмай.

Боран соқты долығып жер ананың,

Өрт боп жанған өзегін суытқандай.

Бұл боранда жандар көп арам қатқан,

Адуыны сондықтан алаңдатқан.

Шерлі боран соғуда жер ананың,

Кегін алып жатқандай адамзаттан.

Дүр сілкінсе табиғат жоқ амалың,

Табиғатта кім ұққан нала барын?!

Қамқоршыдай ақ боран жер ананың,

Ақ дәкемен таңып жүр жараларын.

Ақ қасқыр боп бұл боран ұлығандай,

Ауыр еді қасқырдың мұңы қандай?!

Сол жыртқыштан кеудесі кекке толы,

Тобыр халық қашып жүр түгі қалмай.

Талай боран әскері көктемде өлген,

(Біздер жайлы сұрады-ау өткендерден.)

Дүлей боран қатігез мына әлемге,

Жазалаушы әскердей көктен келген.