Өлеңдер ✍️

Сенің ғана көздеріңмен көргім келген әлемді,
Сенің ғана сөздеріңмен өргім келген өлеңді.
Сенің ғана саусағыңмен ағытқым кеп түймемді,
Сенің ғана ерініңмен білгім келген сүйгенді.
Сенің ғана қолдарыңмен әлпештеп пәк сәулені,
Сенің ыстық тынысыңа күйгім келген әуелі.
Сенің ғана шаштарыңда қалғым келген тұншығып,
Сенің ғана асқарыңа қалғым келген бір шығып.
Сенің сұлу бұрымыңнан иіскей-иіскей гүл иісін,
Сенің ғана қулығыңнан өлгім келген у ішіп.
Сенің ғана құшағыңды қанат қылып... Күн асып,
Сенің ғана кірпігіңе кетсем деймін ұласып.
Сонсоң, бүкіл ғұмырымды көне хаттан таңбалы
Оқып шығып, жатқанымда жас баладай таңғалып,
Көкірегімді шаттық кернеп, еңіреуді қош көріп,
Көздеріңнен ыршып кетсем
бұршақ-бұршақ жас болып!..