Өлеңдер ✍️

Адам болып жаралған соң, неге адам боп қалмасқа?!
Адамсың ба?
Надандықтың етегіне жармаспа.
Кісі болып көппен бірге тірлік ету - бір бөлек.
Адам болып қалыптасып, өмір сүру - сан басқа.
⠀
"Мен - адаммын!" - деп айтады барлық тірі пенделер,
Әр адамға өздік "МЕН"-і қолдау берер, дем берер.
Ұмтылайық бәріміз де мәнді ғұмыр кешуге
"Адам" деген атқа лайық, адамдыққа тең келер.
⠀
Адамсың ба?
Терең ұғын, сол атыңды кірлетпе,
Дүние - жалған, сынақ - бәрі, ұмтыл мәнін білмекке.
Ақылыңмен айналаңның ақ-қарасын саралап,
Жақсылардан тәлім ал да, жамандарды үлгі етпе.
⠀
Адамсың ба?
Адамдықтың ақ жібінен аттама,
Өктем сөйлеп, өзгелердің ар-намысын таптама.
Алалама адамдарды қарап мансап, шеніне,
Бірдей қара туысыңа, танысыңа, жатқа да.
⠀
Адамсың ба?
Айла, қулық, өтірікке беттеме,
Жанашырлық, бауырмалдық мейірімді шектеме.
Кешірімді, рақымды бол, жүрегіңе жүк артпа,
Жинап бойға өшпенділік, "мен аламын кек," - деме.
⠀
Адамсың ба?
Айналаңа шуақ нұрын шашқайсың,
Арамдықтан қашып алшақ, адал қадам басқайсың.
Қуанышты, қайғыны да сабырлықпен қабылда,
Маңдайыңа жазып қойған тағдырыныңнан қашпайсың.
⠀
Адамсың ба?
Лайықты бол "адам" деген ұлы атқа,
Шалыс баспа, сүрінбеуге тырыс бес күн сынақта.
Ойың - тұнық, сөзің - анық, болсын таза жүрегің,
"АДАМ" деген асқақ атты тұғырынан құлатпа!!!
⠀
НҰРЛЫБАЕВА ГАУҺАР КӨПЖАСАРҚЫЗЫ
⠀
21.05.2020 ж.