Өлеңдер ✍️

Ақылымнан болса егер айлам басым,
Жағдайымның сезер ме ем жəй болмасын.
Қалтылдаған қайықтай күй кештің-ау
Қалталының қасында, қайран, басым?
Бағым құнсыз,
Болғанда бағам бақыр,
Бар болмысын ақтарып заман жатыр.
Жалмауыздың аспаны еңсемді езіп,
Жəдігөйдің қос қолы жағамда тұр.
Залал қылық болмаса затында елдің
Ақ кіреуке шалар ма ақын көңілін?
Құдай сөзін құп алмай қу дүние
Ауызына қарап тұр əкімдердің.
Əрқайсысы орнатып сарайшығын,
Сарайшықтың келтірер бар айшығын.
Аралықта ақын жүр аласұрып
Ақиқаттың ашам деп қалай сырын.
Жайым бар ма жан баққан,
Дамыл тапқан?
Өлеңші мен
Ери қоймас жəй сөзге қаным қатқан.
Өлеңші мен сақтасын өлерменнен
Өле өлгенше Сарайдың сəнін баққан!