Өлеңдер ✍️

Тағы бір гүлім солды ғой,
Тағы бір күнім өлді ғой.
Баяғы қазақ - сол қазақ,
Баяғы Құдай – сол Құдай!
Қанша жыл салдым араға…
Жаңарған – жалғыз замана.
«Ананың көңілі балада,
Баланың көңілі далада».
Алтын ба,
Жез бе,
Қола ма –
Көргенге көңіл тола ма?
Əурелі күндер қала ма?
Сəулелі күндер бола ма?
Қанаты сынық, Шағала,
Сабала көлді, сабала!
Шағала – менің көңілім,
Түсесің қашан сабаңа?
Көз сатпай арғы жағаға,
Жағадан арғы Далаға,
Барыңды сен де бағала,
Жоғыңды сен де шамала.
Сарайдың іші самала,
Маңайдың түсі сарала.
Салбауыр бұлт, салқын күз
Санаға салмақ сала ма?..
Тұз сеуіп жанды жараға
Жағадан жауым ала ма?
Кəззəптің кəсіп, нəсібі
Азаптың алды ғана ма?
Саламын сауал данаға,
Саламын сауал санама:
Біздің де жүйрік шаба ма?
Біздің де жұлдыз жана ма?
Маңайды маңғаз шолғымай,
Қарайды көктен солғын Ай.
Баяғы қазақ - сол қазақ,
Баяғы Құдай – сол Құдай!