Өлеңдер ✍️

Шатпағы шатты-бұтты, шала-бұла,
Шаруам жоқ шарлатанда ала-құла.
Қанша ақын қайтып кетті дүниеден
Қайғы мен қан ұйытып қаламына…
Қанша ақын қабірінде ұмыт қалды,
Қанша асау қу мойыннан құрықталды?..
Қай шортан қарағайдың басын шалып,
Қай заман қайта туды Ұлықпанды?
Көзге атса Ажал-мерген құралайды,
Құлжаңыз құздан қалай құламайды?!
Қай қазақ бұлдап жатыр бұл өлеңді?
Қай қазақ тыңдап жатыр ұлы Абайды?
Ханнан да,
Қайыр қашып қарадан да,
Құлагер құт болмай тұр аламанға.
Балталы Батырашың сөз бе, тəйірі,
Қалталы қазымырға қарағанда!
Аунақшып төсегінде ақын дара,
Төрде отыр төс кеміріп əкім-қара.
Салмағы сары алтындай қара сөздің
Қадірін қайдан білсін қатын, бала…
Иə, солай,
Солай, солай, тасбауырым,
Мазамды майқандады-ау мас кəуірің!..
Қайтесің «қу ағашты» тыңқылдатып,
Одан да Батыстың бір баста əуірін!!!